Tel. 780 770

Kennir tú teg aftur?

“Eg orki ikki meira”

Orkar tú ikki lívið? Kanska einastu løturnar, tá ið tú ert eitt sindur glaður, er tá ið tú rúsar teg?

“Eg føli meg kiksaðan”

Kennir tú teg vánaligari ella minni verdan enn hini? Hjálpir rúsurin tær at gloyma teg sjálvan eina løtu?

“Eingin dámar meg”

Kennir tú teg sviknan av familju og vinum? Er rúsurin ein flýggjan fyri teg, so tú gloymir allar tínar trupulleikar og ert glað?

“Eg dugi einki”

Kennist tað torført at liva upp til forvæntningarnar, sum foreldur, vinir og onnur hava til tín? Tekur rúsurin trýstið vekk?

“Eg vil bara passa inn”

Kennir tú teg øðrvísi og uttanfyri? Ger rúsurin teg ósmædnan, avslappaðan og djarvan?

“Mamma og babba skeldast altíð”

Hevur tú upplivað, at tíni foreldur eru farin frá hvørjum øðrum? Ella er tað óbehagiligt heima? Hjálpir rúsurin tær burtur úr keðiligu kenslunum?

Hevur tú ein rústrupulleika?

Hevur tú ein rústrupulleika? Onkuntíð kann tað vera ringt at vita. Hvussu nógv er ov nógv? Hvat er tað fyri atferð og hjáárin, sum fylgja við einum rústrupulleika?

Um tú ivast í um tú hevur ein rústrupulleika, so kanst tú taka hesa royndina. Hon er grundað á royndir, sum verða brúktar innan heilsuverkið og hon tekur ikki meir enn 2 minuttir at svara. Royndin er galdandi fyri bæði rúsdrekka og rúsevnir.

Spurningar og svar

Nær hevur man ein rústrupulleika?

Um rúsurin fyllir nógv í lívinum hjá einum ungum, so er tað kanska, tí tey hava trupult við at takla lívið. Tað snýr seg ikki so nógv um hvussu nógv tú drekkur, men hví. Og tað snýr seg um avleiðingarnar, tað hevur fyri títt lív.

Kanska brúkar tú rúsin til at stýra tínum kenslum. Summi kenna stóran ótta, og rúsurin hjálpir teimum at tora betur. Summi kenna lítla og onga gleði í lívinum uttan rúsin. Og takkað verið rúsinum, kenna summi ung ein lætta frá trýstinum og strongdini, sum ofta eyðkennir gerandisdagin.

Í øðrum førum brúka ung rúsin til at passa betur inn sosialt. Tey rúsa seg, tí hini rúsa seg. Við rúsinum gerast tey ósmædnari og djarvari. Ella er rúsurin ein máti sum fragast at handfara negativar og skaðiligar relatiónir.

Og fyri summi er rúsurin einasti lættin í einum gerandisdegi, sum er merktur av ógvusligum kreppustøðum.

Rúsurin hjálpir. Men rúsurin er eingin varandi loysn. Og hann kann hava álvarsamar fylgir við sær. Tað hevur stóran týdning, at tú, um tú brúkar rúsin soleiðis, lærir at handfara lívið á ein annan, haldbarari hátt. Ein, sum ikki dugir at handfara lívið uttan at rúsa seg, kann lættliga gerast bundin at rúsinum og hava so stóran tørv á rúsinum, at viðkomandi ikki megnar at liva uttan hann. Og tað kostar sera nógv, bæði fyri tann, sum er bundin, og tey, sum hava við hann ella hana at gera.

Hvat er DAT?

DAT stendur fyri Dialektisk Atferðar Terapi. DAT er ein viðurkendur, vísindaliga undirbygdur sálarfrøðiligur viðgerðarháttur, sum verður brúktur um allan heim.

Sambært DAT er tað nógv í okkara lívi, sum vit kunnu broyta, men eisini ymiskt, sum er best fyri okkum at góðtaka. Somuleiðis byggir DAT á sannføringina um, at vit øll gera tað besta, vit duga, men vit kunnu eisini læra nýggjar førleikar fyri at gera okkara lív betri.

Endamálið við DAT Ung er at hjálpa ungum at handfara lívið uttan rúsin og harvið fyribyrgja, at ung menna ein álvarsaman rústrupulleika. Hetta inniber bæði einstaklinga- og bólkaterapi, har tann ungi saman við einum sálarfrøðingi lærir førleikar, ið hjálpa at handfara tey tungu og truplu tingini í lívinum. Og sálarfrøðingurin er altíð til taks umvegis telefon.

Í DAT Ung verður dentur eisini lagdur á, at familjan gerst partur av viðgerðini.

Hvønn er DAT Ung fyri?

DAT Ung er fyri ung millum 15 og 18 ár, sum hava rústrupulleikar.

Einum nýtist ikki at vera “misnýtari” fyri at vera við í DAT Ung. Tað snýr seg ikki um, hvussu stór nýtslan av rúsinum er, ella hvat slag av rúsandi evni talan er um, men heldur um hvussu ein nýtir rúsin. Brúkar ein rúsin í ein ov stóran mun at stýra truplum kenslum, handfara negativar relatiónir ella flýggja úr kreppum, so er tað kanska eitt gott hugskot at leita sær hjálp hjá DAT Ung.

Tú ert altíð vælkomin at ringja til okkum á telefon 780 770 ella trýsta her fyri at senda okkum eini boð.

Hvar gongur DAT Ung fyri seg?

Viðgerðin fer fram í Tórshavn og er ambulant; tað vil siga, at hon ikki inniber innlegging, men lættliga fæst at passa inn í ein vanligan gerandisdag.

Kostar tað, at vera við í DAT Ung?

Nei. Viðgerðin er ókeypis.

Frágreiðing um Dat-ung